الكيل طفح يا عم ( ابو الغيط)؟

كتبنا عن مشاكلنا و شغلنا و توفير لقمة العيش و الطحن اليومى و انشغلنا و اتلهينا و قعدنا ساكتين ..لكن الهم مش راضى بينا و لا سايبنا فى حالنا ناكل عيش ..بيطلع لنا لسانه القذر..مالكوش لازمة ..مالكوش لازمة ..مالكوش لازمة؟ لما نقرا ان عمنا المستثمر الكبير ابراهيم كامل عليه مليار و ثمانمائة مليون جنيه لبنك القاهرة و ماحدش طالبه بيهم و فشلت المشروعات اللى دخل فيها بنك القاهرة معاه و دراسات الجدوى الوهمية اللى عم الكبير عامل فيها كبير أونطة ؟زى غيره من رجال الاعمال التليفزيونيين ..اللى بيتكلم بفلوسه و يعرض اسباب نجاحه و هى ليست ابدا اسباب نجاح انما عنطزة من كون فلوس ..اولى بيه يحكيلنا ازاى كونها ..لو كان جرئ؟ و كم من اصحاب النجاحات ..و ان كانت فلوسها قليلة الا انهم محجوبون عن الاعلام و الاته ؟المهم انك تسكت على كده ..يغازلك مشروع مترو الاربعة مليار فى اربعة كيلو متر ..عفوا مترو العباسية ..وتسكت على كده يفاجئك تصريح غريب او تصادم عجيب من عمنا نظيف بتاع ان الحل الوحيد لازمة بلدنا و دفع عجلة التنمية هو الاستثمار الاجنبى ؟ و الاجانب يجيبوا فلوس هنا ؟و الا مفيش فايدة ؟ و هو كلام يعكس عدم وجود خطة ...ناهيك انه لا يتشاور مع احد غير حكومته ؟ حتى الريس بيتشاور مع دووول و دوول ..اظاهر عمنا نظيف لا يرى سوى طبقة رجال الاعمال -الكبار طبعا- اللى هو منها ؟و تاخد مقالب من رجالته فى الحكومة للصبح ..خلينا نبعد عن المناصب السياسية ..كعادتى هنا ..واعلق على المناصب التى تمس حياة المواطن اللى زينا ..منها مثلا الاسكان ؟و الطبل و الزمر على خطط الوزير البناءة و كلها بيع و تقسيم اراضى يقدر يعملها اى سمسار على عجلة فى التجمع الخامس مش بحراسة وزير؟و منها مثلا الاستثمار اللى ما شفنا على يده قانون واحد يحمل تسهيلات لصغار المستثمرين المصريين ؟باستثناء تقليل الاجراءات قصاد زيادة الرسوم ؟ و التسهيلات التى نعنيها موااال تانى خالص ؟و منها منصب كان سياسى ..و تحول الى ادارى وظيفى على يد اخونا وكيل الوزارة-و لا نستطيع نعته بالوزير- ابو الغيط باشا- اللى كل ما ينضرب مصرى بره على القفا ..يا اما يكذب يا اما يدارى وشه -يا اما بالكتير يعمل اتصال تليفونى بوزير خارجية الدولة التانية يطيب خاطره بكلمتين و يقوله معلهش دول غلابة ما تطردهمش و ترجعهم لنا مش حانعرف نستفيد منهم و نشغلهم ؟ و زيح يا عم زيح و يجعله عامر...و لا عزاء للمصريين فى ليبيا و الكويت و البقية تاتى ؟يا أونكل نظيف ..نفسى اصحى من النوم الاقى حد من وزارتك بيتصرف وفق الخطة المرسومة فى اول الخطة الخمسية الاخيرة و عندك قياسات اداؤه لو انت صحيح امريكانى حتى ؟ لان اللعب على الحبلين مش حلو ..كلام امريكانى ..و تطبيق فهلوة مصرى ..مفقوس يا خبيبى؟

حرارة الجو ...وبرودة المشاعر ؟

مع نسمات اغسطس القاسية اللمحات الخانقة الانفاس المحيطة بنا اينما اتجهنا داخل القاهرة العامرة الزاهرة و مع اعصاب الناس الفائرة فى المرور و العبور -و الشروق كمان و الله - تشعر انك مش طايق نفسك ...نفسك ترمى نفسك فى اقرب ترعة و تعوم حتى لو مصيرك نفس مصير عبد الحليم حافظ بعد البلهارسيا ؟المهم انه رغم هذه الخنقة و تلك الشنقة ..لا شك ان قلبك ينبض بحب من تحب و ذكر من تريد و مودة من تود الابقاء عليه و محبة من يقف بجانبك فى الازمات ..او بمعنى اخر ..لا يعرضك للازمات ؟ الا انى فى ذلك الخضم اكتشفت برودة قلووووب فى عز أغسطس؟ اى و الله ثلج يا اخويا ثلج؟أو كما قالت ستى ...على قلبهم مراوح ؟نعم تعجب ممن يأمن لاحوال الدهر هذا الامان ..و هو بالتاكيد ليس أمان المؤمنين المسلمين بمصيرهم و الراضين باقدارهم - و انما اقصد من مارس اللؤم و الخداع او الدهاء للوصول الى الاحتفاظ بكروت ليست من حقه و فيها ظلم للاخرين و مبالغة فى الاعتداء عليهم ..و فرح بما وصل اليه ..و طالما ان تلك الكروت فى حوزته فهو آمن ..نائم ..هادئ ..ليس حبا فى الكروت ..بقدر ماهو رغبة استحواذ و انانية ...و هذا هو البروود بعينه الذى قصدته ؟و ليمت اصحاب الحقوق فى تلك الكروت او ليذهبوا هم للبحث عن وسائل تعيد السخونة الى الموقف- و بالتاكيد ليس الى قلوبهم - فقلوبهم قد ماتت ..انتحرت ..تحجرت انانية و حرصا على جمع اكبر قدر من الكروت التى تؤمنهم فى الدنيا - مال ..شقق ...حرية..تحكم ..سلطة..و ربما أولاد -المهم الا يدفعون شيئا من نفوسهم -من قلوبهم - فى المقابل ؟اية برودة تلك فى أغسطس يا سادة ؟ الغريبة انهم دايما اكتر ناس طلبا للمكيفات و الذهاب الى الشواطئ؟بقت برودة و سقالة ؟و عجبى ؟

هى الحالة ايه ؟

شغلنى شاغل اقوى من الخواطر و التدوين و الذى منه ؟ألا و هو أكل العيش و الله و ليس التصييف فى مارينا و لا الاستمتاع بجمال الساحل الشمالى الذى لم أره فى حياتى حتى الان ...و لم أر الحوريات اللواتى يحكين عنهن ؟رغم انى قاربت على منتصف العمر و الحمد لله صنايعى بيزنس و كسيب برضه ؟انما هى تلك طبيعة الحياة و أكل العيش فى بلدنا المحروسة الان ....

خذ عندك ..طالما انك تلعب فى مستوى يبلغ أحاد الستة أصفار فقط ..فلا احد يعبأ بك و لا يهمه انت حاتكمل و لا لأ ؟عندك مشاكل و لا لأ ؟مع الاعتذار لكل شعارات الجرايد من مساعدة صغار المستثمرين ؟و برضه دى ميزة ..لان ماحدش حاطط عينه عليك ؟ انت باختصار بالنسبة لعالم البيزنس فى مصرحاليا ..لا شىء؟؟اى و الله يجب ان تصدق ذلك ؟و ستستمر لا شىء حتى مستوى الخمسة ملايين ؟بعدها ممكن حد يسمعك ؟ و ربنا يستر عليك ؟

المهم هو ان هناك سوق واعد كبير و ضخم ملىء بالطلبات لاى تاجر من الممكن ان يعمل على تغطيتها و تبقى مصلحة للجميع ..التاجر و المستهلك و البلد ..أول ما العبد لله قال البقين دووول لمدير البنك ...قاللى يا بيه انت شايفنى رئيس وزراء مصر ؟ انا ليا بمكسبى و بس ؟

و اول ما العبد لله برضه قالهم لرئيس مجلس ادارة شركة حكومية كبرى بتتعامل فى نفس الموضوع ..قاللى انا مالى و مال البلاد و العباد ..و أول ما العبد لله -المترمط- بحثا عن تكبير البيزنس -و ليس تكبير آخر من اللى بيكسب الايام دى- و استغلال الفرص فى احسن جدوى لها ..عرضته على مدير ائتمان آخر ....و هكذا دواليك حتى وصلت الى العائلة الكريمة ...و اكتشفت وقتها ان البيزنس فى مصر محتاج ( مناحية) ....فى كل الاتجاهات ..مع الزبون و من ثم مع المورد و من ثم مع البنوك ..و من ثم مع الجمارك و الهيئات التى توافق عليه ....و هكذا حتى ترى الشيك ..و ما ان تراه يا ولدى حتى يأخذه شغلانة تانية و تدخل انت الدايرة تانى ؟ و كأنك و الله العظيم شحات ؟و لست مستثمرا ؟و الغريب و الانكى ان الحكومة توصى الناس بالبنوك و تقول ان ربحها حلال لانها مشاريع تعود على البلد و فرص عمل و هكذا ؟و الحقيقة ان ذلك كلام جرايد و انه لا يوجد اية تعليمات لدى قطاع البنوك تقول كده ؟ انما التعليمات ...سلفه ..على قلبه ..و اضمن الفايدة قبل ما تضمن شغل العميل ..و اياكش يولع مش مهم ..المهم ازاى ترتب انك تحبسه ؟؟و كل ده طبعا مع الملتزمين النظاميين ذوى اللعب فى حدود الملايين الخمسة ..اما اذا قفزت للخمسين ..فلا ينطبق عليك شىء ابدا ..و حدث و لا حرج عن كل حالات السحب ع المكشوف الموجودة للمحاسيب ..و ربنا يقينا شر المحاسيب ...بس يا ناس يا هو نفسى فى نظام ..واحد يطبق على الناس فى السوق ؟ مش حالات ؟و مزاجات ؟ لانى اكتشفت ان البيزنس فى مصر كمان محتاج (ملاغية) اى و الله و لو مزاج الموظف او المسؤول عالى و مبسوط منك ...هنيا لك ...و اذا العكس يا ويلك ؟ معلهش اصل راسى ساحت من البحث و الملاغية و قلبى وجعنى من المناحية ؟ و نفسى حد يوصف لى حال البيزنس فى مصر .....غير بيزنس العقارات المجنون طبعا ..الذى لا يخضع لقواعد ..انا نفسى اسمع الحالة بتاعة البيزنس المنتظم اللى بيقوم شركات و يفتح بيوت ؟؟تانى يا بنى بتكلمنى على انى رئيس وزراء مصر ؟؟اظاهر انا جاتلى حالة ..و حاكلم نفسى ؟بس برضه الحالة ايه؟