لسه الامانى ممكنة ؟

بالتاكيد امانى ..فى حديثى اليوم ليست فتاة جميلة شابة ..حلمت بها تؤنس وحدتى فى الشتاء التى طالت و طال معها صبر شباب شرفاء كثيرون فى مصر ..؟ و ليست جمع امنية لبلدى التى اتمناها بجد أم الدنيا تانى و هى عديدة فى مجال الحب و العمل الجماعى المتقن و الود المفقود و الطموح فى الريادة الى تكامل علاقات اطراف المجتمع كلها ؟ و ليست جمع منية اى وفاة احد من ابناء البلد تحت عجلات قطار او عبارة او حادثة سيارة فى طريق مظلم ؟؟ و ليست بالتاكيد امنيتى لفقراء و بسطاء بلدى ان كل واحد يلاقى لقمة ياكلها و سقف يظلله ؟ انما هى هذه المرة ..كل هذه الامانى مجتمعة ...احملها اليك خطى الزمان المستبد ؟ و مع الاعتذار للست ..فقد رايت اشارات حب لا زالت فى هذا البلد ..للعمل ..لا زال هناك اناس يتمنون الخير لبعض ..و نفسهم اللى بادى صغير فى السوق يكبر ..زى ما فى الاف غيرهم ما يتمنوش ؟؟و لا زال فى جمال فى بعض القلوب مدارى ؟ اتمنى ان اراه على الطبيعة بس يارب يآمن و يدينى اشارة ؟ لسه الدنيا بخير ..يا حبيبى ..مع الاعتذار لجورج وسوف ..و لسه فى رجالة جدعان عندهم قلب فى مصر ام الدنيا ..أى و الله!

عالم رايقة ؟و ناس مش طايقة؟

ياسلام على روقان البال ..و بعيدا عن مشاكل الاستاذ الفنان فاروق ..و المصفقين اللى غاظونى بتحليلات مالهاش لازمة فى الجرايد ؟ تقريبا نص اعمدة الاهرام -ماعدا - سلامة احمد سلامة و صلاح منتصر و انيس منصور- بما فيهم المؤرخ اللى كنت اظنه محايدا د.يونان لبيب رزق ؟؟ و اخرين ..لم يفوتوا الفرصة حتى حتى يسموا مساءلة السيد الوزير الفنان دستوريا و برلمانيا و هو حق من حقوق اى برلمان دستورى فى العالم اخطأ فى تصريح يمس شعبه او حتى شريحة منهم ؟فى ايطاليا مثلا حاسبوا نائب برلمان و قامت هليلة عشان غلط فى حق الشواذ ؟و فى بلاد اخرى بيحاسبوهم لو غلطوا فى حق الكلاب و القطط ؟؟ انما السادة الاساتذة المحترمين ..صوروا لنا هذه المحاسبة و المساءلة - اللى كانت جدا راقية هذه المرة الحقيقة - انها يجب الا تكون ؟ و ان الحرية ان كل واحد يقول افكاره العبيطة على الملأ حتى لو كانت تمس الشعب و حتى لو كان وزير و مسؤول ؟؟؟ طبعا كلام فاضى لا يبرره سوى عداوة سياسية ..بين فرق و احزاب ..رحنا احنا كشعب مطحون ...فى الرجلين بسببهم ؟ و ضاعت حقوقنا ... و لكن طريف هذا الاسبوع ..انه بعيدا عن المطحونين و الشغالين و المتخانقين ؟ عمنا الهادىء الرايق ده ..صاحب الاعلان المنشور اعلاه ؟ دفع 35,000 جنيه على الاقل ..ثمنا لاعلان على طريق المحور ..قريبا من سكن حبيبته ليعرض عليها الزواج بطريقة رومانسية ..و رغم انها ستعجب كل البنات و يقولوا اتعلموا يا رجالة يا خناشير الحب ؟ الا انها بالنسبة لخنشور بيحس بشعبه مثلى ...شىء مستفز جدا ؟ و اتعلموا يا اصحاب الفلوس من اصحاب القلوب؟

الى كل مغترب مصرى ؟

نداء مخلص من شخص مصرى مخلص الى كل مغترب مصرى كادح و طامح ؟ارجوك ...اتوسل اليك ..اسمع وحاول تمرر الموضوع على دماغك قبل ما تنفذ اللى يناسبك ؟يا من خرجت من مصر طمعانا فى مستقبل افضل او طفشانا من معاملة تخنق ..اسمعنى بقى حيث انها فى النهاية بلدنا و لازم نعود اليها ...و لا مفر ( و لا اتحدث هنا عن من تجنس بالخارج و طريقه ان شاء الله يارب يبقى زى محمد الفايد ) و لا اظنه سيتكرر ...المهم ان حديثى عن من سافر للعمل و لا زال يحلم بالعودة ...و لا جدوى من الحديث عن ان كانت مصر بلدنا حلوة ام لا ؟ فامنا اللى ولدتنا قد لا تكون ملكة جمال او حائزة على نوبل و لكنها فى نظر كل منا افضل مخلوق فى الوجود ...و لذلك ..امامك ثلاث خيارات و رابعها مر ... ان اردت التعامل مع بلدك بعد الرحيل بالعودة::

الاول :اذا كنت محتفظا بوظيفة حكومية فى مصر ..عليك العودة فى سن الاربعين .تلحق شوية بين اقرانك ...حتى تحظى باحترام و تعاون زملاؤك و ليس درجة وظيفية بلا مستوى او معرفة من احد ناهيك عن الحقد و الغيرة اللى حاياخروك؟

الثانى: اذا كنت موظف قطاع خاص ..و ناوى تلم شوية فلوس و تشوف خبرات جديدة و تتعلم حاجة نظيفة برة الى اخره من فوايد السفر السبعة او اكثر و ترجع تلاقى وظيفة قطاع خاص هنا قبل ما تعجز ..عليك الرجوع ايضا قبل الاربعين ..و كفاية القرشين دوول

الثالث :اذا كانت احلامك ..هى ان تكون مؤسستك و مشروعك القطاع الخاص عند العودة ...ارجع بفكر واضح تدافع عنه فى مشروعك ..حوالى الاربعين برضه ..بشرط ان يسنده ..ما لا يقل عن 3-4 مليون جنيه مصرى لان اقل من كده يفتح لك سوبر ماركت بس فى مصر الان ! و تقضى بقية حياتك تقطع جبنة رومى فيه؟

اما الرابع و الاخير و هو المر بعينه ..و قلة القيمة ذاتها : هو ان تظل هناك بخلاف اى حال من الثلاثة السابقة ...و انت موظف و لا انت عايش عيشة حلوة و لا انت عيالك تحيا حياة طبيعية و لا مهيالك الخيارات الثلاثة دى فى اوقاتها ..وكلها حول الاربعين كما ذكرت ..و شاغلينك بان هنا احسن من بلدك حتى ياكلوك لحم و يرموك عظم ..و عند الكبر تفتكر كلامى ..لو مطاوعهم ...ساعتها ...اقعد هناك ..و قول على نفسك و ما تبقى من عمرك يا رحمن يا رحيم ...او احسن لك تفتكر كلمة ( عادل امام ) لمراته ...غطينى و صوتى !فقد ضاع العمر يا ولدى ؟

كلام كبييير ؟؟

عاوز تكون مشهووور من غير تعب ..من غير شغل ...من غير ابتكار ..من غير ثقافة ..فى زمن عدم التجديد الفكرى و الثقافى ده ...حاجة بسيطة قوى ..فى زمن المصفقين لكل اللى بيقول كلام كبير؟كان زمان (خالف تعرف ) دلوقتى ..خالف شىء واضح زى الشمس ..احتج على حاجة ثابتة فى عقل الناس و ضميرهم من زمان ..اتكلم فى ما لا يعنيك ...اصرخ ..و قول ان الهرم مش بتاع المصريين مثلا ..او ان مصر لم تمر بحضارات متعاقبة ؟ او ان محمد على لم يكن البانيا و انما كان من دمياط و ان لديك ادلة ؟و حلنى على ما حد يشوف الادلة ..تكون ظهرت فى كام ندوة ..و كتبت فى كام جريدة ..و بقيت مسخة فى الحوار ..ده الاول بس...بعد كده يتم تلميعك ..و سندك و دعمك ...و تبقى العيشة فل ؟هذا هو ما يحدث الان حينما تسمع حوارا عن ايام النكسة ..و من السبب فى الحرب و الضرب ..و يزيد التون شوية لما يوصل للرئيس الراحل السادات ..و يزيد اكثر لما يوصل لقضية الادلاء بالراى فى الحجاب ؟؟ و اغلب الظن ان السيد وزير الثقافة و من وراؤه --وحايبقوا كتير- اليومين اللى جايين و الله -كان يقصد خلافا سياسيا مع الاخوان و بس ؟ و للاسف ان من وضعوه فى معركة اكبر منه ..ليس لانه اضعف من الاخوان ؟ و انما لانهم اختاروا له موضوع محسوم من قديم الازل ؟ و انساق وراؤه الفنان بلا دراسة ..ربنا انزل عقيدة واحدة للكل مؤداها ان ربنا واحد ..و انزل شرائع متلاحقة متعددة ..من الزبور الى التوراة الى الانجيل بعهوده ..و نهاية بالقرآن ..كلهم متكاملين ..لا يمكن يكونوا متناقضين ..و القصة انه تدرج طبيعى زى ما ذكرت من قبل ..انسان مؤمن موحد ..معاه الاعدادية ثم الثانوية و ختم بالجامعة ..الاكثر تفصيلا و توضيحا ..و للاسف و من خيبة امل من طرح هذا الموضوع ان الحجاب بالذات منصوص عليه لمن رغبت فى التدين فى الشرائع الثلاث ..و اتفرج على متدينات اليهود و راهبات المسيحية و مؤمنات الاسلام ..و القصة اكيد شروط و مواصفات و سلوك قبل حتة القماش ؟ و الموضوع كله لا حايقدم و لا حاياخر من قناعات المصريين المؤمنين بكل طوائفهم ؟و مش معقول عمنا ثقافة يقف فى وش كل طوائف الشعب عشان خلاف سياسى مع الاخوان ؟ يا جماعة يا كبار ..صدقونى الشعب اهم ..اشترونى و اشتروا خاطر عيونى كمستقل ..كشريحة كبيرة تحتاج انها تتخدم و تتفهم و ساعتها مش حايهمكم الخلاف مع الاخوان لانهم مش كل الشعب ؟الادعى ان تخدموا كل شرائح الشعب و نتكلم ساعتها عن اللى نتفق و نختلف فيه يا ساسة ؟ يارب حد يفهم؟

من للمستقلين ؟؟

يا سادة لاحظت كما يلاحظ الكثيرون حالة جديدة فى مصر ..حالة تحزب ؟يعنى كل واحد ..و غالبا من البسطاء او اصحاب المواهب القليلة او غير الطامحين قوى ..يلاقيله حزب يعبر فى اغلبه عن ميوله ..و قد تكون تلك جماعة .. و ينضم اليها ؟و ساعتها يبذل جهده للترقى فيها و ارضاءها ؟و ارضاء رغبات نفسه؟و مدى طموحه ؟عموما ...و اعود ثانية الى الفئة التى انتمى اليها و ادافع عنها ..و هى مثقفى هذا البلد ..الغير متحزبين ؟؟يعنى بيحبوا بلدهم و بيخدموها بس لا ينتموا للحزب الحاكم ؟ و بيعترضوا على الفساد و الفوضى فى البلد بس لا ينتموا الى احزاب المعارضة ؟متدينين بطبيعتهم ولكن لا ينتمون الى الاخوان المسلمين من جهة و لا جماعات الكنيسة المنظمة الشبيهة بالاخوان من جهة اخرى ؟رياضيين بيحبوا الزمالك و الاهلى و الاسماعيلى و المصرى و الاتحاد و ليسوا مكسوفين من ذلك ؟يا جماعة ...من يدافع عن هؤلاء الغير متحزبين الان ؟ من لغير المسنودين فى البلد دى ؟ من يعبر عن مصالحهم و اراءهم فى الصحافة و مجلس الشعب و التليفزيون ..طول ما هناك هذا التحزب الممقوت ؟ يا جماعة المتحزبين انتم بتفقدوا مصر احلى سماتها ..احلى صفة تجعل مصر دائما مهيأة للتجدد و تحمل الجديد فى الحضارة ..و هو ثقافة التعدد ..ان الراجل كان ...بيحترم المراة ..و ان المراة كانت ...بتحترم الراجل ...و ان القلة فى البلد كانت ..بتحترم الاغلبية ...و ان الاكثرية كانت ..عادلة مع الاقلية ...و ان الحكام كانوا ...مستمعين للمعارضة ...و ان المعارضة كانت ..بتراعى مصلحة الناس مش الدعاية و التصفيق و التخبيط ؟و ان الرياضة كانت بلا شتيمة او تعصب او ارهاب؟ و ان الفكر و التدين كانوا ...متاحين لكل واحد ..بلا رقابة ..ما لم يجرح شعور الاخرين و معتقداتهم ؟؟ يا سادة ..نريد ان نضرب مثالا ان مصر ..فيها متسع لكل الاتجاهات ..قبل ان نتحدث عن فوضى العرب و الدول المحيطة ..و هى اول خطوة لنعود قدوة .و ان يعود اليها روح التجدد المفقود..و بالعموم..لتعود مصر ..ام الدنيا

البنات عاوزة ايه ؟

القاهرة- أكدت احدى الدراسات الامنية المصرية الحديثة زيادة معدلات الجرائم النسائية خاصة فيما يتعلق بجرائم القتل .
وأشارت الى أن عدد النساء القاتلات في السجون المصرية 560 قاتلة وأن سبب ارتكاب المرأة لهذه الجرائم يرجع الى العنف المادي والمعنوي الذي يقع عليها من المجتمع وقالت الدراسة أن 22 بالمائة من الزوجات يضربن ازواجهن وأن 78 بالمائة من القاتلات اعمارهن لا تتعدى ال 25 عاما وذكرت أن 39 بالمائة من جرائم قتل الازواج تتم بدافع الانتقام من الزوج و 12 بالمائة من اجل المال و 11 بالمائة للدفاع عن النفس و 10 بالمائة لاسباب عاطفية كما ذكرت وكالة الأنباء السعودية كما اظهرت الدراسة أن 10 بالمائة من القاتلات هربن من مسرح الجريمة و 27 بالمائة منهن اخفين الجثث و 80 بالمائة شوهن ازواجهن بعد قتلهم .و السؤال الان ..هو ده اللى عاوزاه المراة العربية و المصرية ؟ بدلا من ان كانت مفترى عليها تصبح مفترية ؟ بدلا من ان كانت مهضوم حقها تصبح ظالمة ؟ من يسمى الافتراء مساواة يا سادة ؟ و هل هذه المشاركة المجتمعية المطلوبة ؟مين بيزقها لخراب علاقتها بالرجل ؟؟ وما عائد ذلك على المجتمع ككل ؟ يارب حد يسمع ؟

قبل الزمن ما يعدى و انت وحيد؟

احيان كثيرة تشعرنى برودة الشتاء و لياليه فى المساء بالانتعاش ..و الحياة ..
و اليوم ..مع ظلمة الليل البارد و وحدته ..احسست شعورا جديدا ..
شعور معظم جيلنا الحالى اللى عايشين لنفسهم ..و تذكرت كلمات اغنية لبنانية دافية بتقول:
بنعيش بدنا لا حدا ..لا اصحاب حتى و لا عدا ..بس الزمن ما بينطرنا ...و العمر ماشى
صحيح ..كل منا مهتم بشغله ..بنشاطه ..و لمن عنده اسرة ..باسرته ..و خلاص ...؟
مفيش صحوبية زى زمان ؟مفيش معارف وثيقة زى زمان ..باتكلم عن عشر سنوات مضت يا ناس؟
مفيش قعدة دافية فيها تبادل افكار و اخبار و مودة زى زمان ؟
عايشين لوحدنا ...البيوت كترت بس كل واحد قافل على نفسه بيته ؟بيكتشفوا ساعات ناس ماتت جوه بيتها من ايام و ماحدش خد باله؟و مع كثرة البيوت ..ازمة السكن زادت ؟ ما هو كل واحد عاوزها لوحده ؟
السيارات كترت ...و مع ذلك قلت زيارات الاقارب و صلة الرحم ..و الغريب ان ازمة المواصلات زادت ؟ ما هو كل واحد و ابنه و بنته و مراته عاوز يمشى لوحده فى الشارع ؟
و الاغرب ..ان كل واحد جواه مشاعر رقيقة جميلة ..بس بيعيشها لوحده ؟
و يندب الزمن و الحظ ..منين اجيب ناس لمعنى الدفا و الحب و القرب يفهموه ؟
يا عم الريس ..فووووق ...ازاى يحسوك و انت بعيد ؟
و تذكرت عندها غنوة ..حبيبى و انت بعيد ..مشتاق للمسة ايد من غير و لا همسة ..قرب و مد ايديك ..اول ما فكر فيك ..حاتحس باللمسة !...ياعم ..كلم اللى بتحبهم و صالح حبايبك اللى فايتهم و كفاية مشاكل ..و حاتشعر بالدفا ..بس مين يقول و مين يسمع؟