لقطات سريعة ..آراء رجل شارع ؟

-قال لى رجل شارع مثلى ان قضية الفلسطينيين الان تحتاج عقل و حكمة و لما ابلغته ان قرار عمنا عباس ضد نتيجة الانتخابات الرسمية ..قال لى برضه حماس لازم تعقل و تيجى على نفسها شوية لان ايام اذا الشعب يوما اراد الحياة ما عادتش موجودة ..فى الان ماذا تريد امريكا للشعب و ابو الشعب و حكومة الشعب ..قول لهم يعقلوا و النبى و يضحوا احسن ما تبقى جزائر تانية و يشمتوا الصهاينة فينا ؟

- قال لى رجل شارع اخر شبهى ان موضوع العراق محتاج ان الشيعة يخافوا ربنا شوية و يصدق الفعل القول و يبطلوا يسمعوا كلام امريكا و ايران لانهم الاتنين مش عاوزين مصلحة لا شيعة و لا سنة العراق عاوزينها فوضى و كل يغنى على ليلاه ؟؟ فمن ينقذ ليلى العراقية الا اهلها يا ناس ؟؟

-صرح لى رجل شارع اعلم منى ببواطن الامور ان هناك خطا ما من ناحية الاخوان فى فهم اليات اللعبة السياسية فى مصر الان غير عابئين بمن يسيطر على الجرايد الحكومية و الاعلام الرسمى ناهيك عن النيابة و البوليس و القضاء ؟؟ و لكن سؤاله هل الخطا الذى فعلوه يستحق كل تلك الضجة فى حين تسكت كل تلك الاجهزة عن تعذيب ناس و خطف ناس و مقتل اطفال و انتهاك عرض بنات و تحرش بمواطنين ؟ و لا احترام القانون عندنا لناس ناس ؟؟و ياترى الدولة عملت ايه لمن قتلوا الظابط الذى كان يحمى القانون فى اراض وادى النطرون ضد الخارجين عن القانون ؟

- قال لى رجل شارع ان الدنيا حلوة فى مصر طول ما نت مستغنى عن الناس ..اول ما تحتاج لهم حايخذلوك ..رغم كثرة ادعاء الفضيلة الان و العودة للجذور و كثرة الجمعيات الخيرية التى تهتم بالصدقات و اليتيم و البر و الطعام ؟ انما الدين المعاملة قبل الصدقة يابنى ؟

- فرح رجل شارع حزين كثيرا لان ابو تريكة احرز هدفين و خللى الاهلى الثالث فى بطولة العالم للاندية و الحقيقة انا انبسطت معاه بابو تريكة لانه راجل مصرى زينا ..يعنى بسيط و محترم و راجل مؤدب و يتحب ..الحقيقة يستاهل

-بكى رجل شارع يحب الحرفنة و اللعب الجميل طول عمره على حال الزمالك و ادارته اللى مش عارفة تاخد قرار و تضع خطة للسنتين الجايين ترجع بيها للنادى حلاوته ؟رغم ان الاداريين الزملكاوية كتير انما المصالح تغلب ..يا ميت خسارة على قلة العقل ؟

-اخيرا و ليس اخرا ..كان فيه نكتة جديدة اسمها البهائيين عاوزين يسجلوها ديانة فى مصر ..بلا وكسة هى المشرحة ناقصة ..؟؟ المهم انا زعقت لكل اولاد الشوارع اللى فوق دوول و ما سكتوش غير لما خوفتهم بالتوربينى ؟ ساعتها كل واحد لم هدومه كويس و روح لامه ..قبل ما يتجرأوا على فتح مواضيع اخرى و الحمد لله جت سليمة .