*هناك طريقين لتكوين مستقبل و عيشة مستقرة فى مصر ...اولهما هو الفهلوة و لبس طاقية ده لده ؟ و حاول تحط رجل فى كل حتة ماحنا بتوع كله و ننفع فى كله و فهيمة ..و دى سكة خلصت صلاحيتها من زمان ...و التانى هو السهر كل يوم فى عملك و الا ترى الشارع من 10 الصبح الى 10 بالليل ؟ايهما يختار الرجل الحر المكافح يا جماعة ؟
**يعجبنى كثيرا فضيلة الشيخ على جمعة ..مفتى الديار المصرية...رجل لديه من الفقه و الحداثة ما يفوق الكثيرين من متفيقهين الفضائيات ؟ الحقيقة بيعجبنى اكتر من عمرو خالد و جاسم المطوع ...راجل عملى اكتر يمكن ؟ مش دعائى يمكن ؟فيه حاجة؟
***موضوع انفلونزا الطيور فى مصر موضوع ماشى كالنار فى الهشيم و ماحدش واخد باله ..ماحدش بياخد اكشن ضده ..و الاصابات فى الغلابة موجودة ؟ و لا يكفى معها شفافية السيد وزير الصحة المحترم؟يكفى معها اخذ قرارات و خطوات يا سادة و ليس بيانات و تصريحات؟ الغلابة ليهم ربنا ؟
****موضوع البنك المركزى ..و يرفع الفايدة على الودايع عشان الناس تسيبها من استثمار العقارات ام يخفضها عشان التضخم ما يزيدش؟موضوع شائك ..و يلزمه حرية قرار للبنوك كل واحد يحسبها حسب دراسته هو و ليست تعليمات شمولية من اعلى ؟و الا سنرجع للدولرة تانى و زيادة اسعار الدولار؟
*****موضوع عيد الام و مناسبة عيد الام و هدية عيد الام .لذيذ ..بس متهيألى ان امهات الجيل الجديد غير امهاتنا ...معذرة دى حقيقة؟
******موضوع الحكم الاخير بسجن اربعة موظفين غلابة منهم اللى معاه المفتاح و منهم اللى مقفلش الباب و اللى ما فتحوش و تبرئة المسؤولين الكبار عن الثقافة فى وفاة 50 مسرحى و اصابة 30 من عامين ؟ امر سخيف و لا يمكن تصوره الا انها بلد مناصب صحيح ؟
******و النبى يا جماعة ليا طلب ..نفسى اللى فاهم ايه التعديلات الدستورية دى ؟و يعنى ايه تعديلات ؟ و يعنى ايه دستورية ..و ايه علاقتها بدستور يا اسيادنا اللى بنقولها عند دخول البيوت ؟ اللى فاهم ايه مواضيع صفحات الجرايد الحكومية ده ..يفهمنى ..احسن انا سامع ضجيج و مش شايف طحن؟
******هو حد لسه سامع حاجة عن العراق يا جماعة ؟ مفيش اى محاولة ان القمة العربية الجاية ممكن يعنى و لو سمحت ...تصدر اى شىء ليه علاقة بلجنة للجلوس مع الحكومة الشيعية و توصيتهم بالوحدة و الحفاظ على حياة اخوانهم السنة هناك ؟؟نفسى ؟
3 comments:
الفيلسوف
انت عارف انك اتكلمت عن لسان كل واحد فينا بمنتهى البساطة قلت اللخبطة اللى جوانا
وازنت بين شقا 12 ساعة وبهدلة اخترناها لما ماتت حياتنا الاجتماعية وبقينا زى العبيد او الطور فى الساقية امام اللى بيلعب التلات ورقات وشايفينه قدامنا بياخد حقك وحق غيره بدون ادنى مجهود
اتكلمت عن خواطر كل واحد فينا بيفتح جرنال ومش عارف ايه اللى مكتوب ده واخرت الكلام ده ايه
اتكلمت عنى وعن المواطن العادى اللى عايز حد يقوله الدستور ده اخرته ايه ولمصلحة مين كل ده وفين مصلحتنا احنا وسط حملة المصالح الضاربة
وفى النهاية سألت اللى فاهم يفهمنا معاك لاننا فاهمين مغزى اللعبة كلها بس يا ترى هما عارفين اننا فاهمين ولا شايفين ايه فينا
حضرتك اتكلمت اولا على الشغل والكفاح اليومي المستميت: في رأيي ان بتاع كله ده نصاب و منافق وان الوقت الحالي عاوز شغل من نار طالما انك شريف وابن حلال و مش بتاكل من حرام يعني خايف من ربنا فتأكد ان ربنا عمره ما حيضيع هذا التعب على الفاضي و ده عن تجارب شخصية كتيرة جدا و لكن للاسف الناس عاوزه كل شئ جاهز و متحضر يعني ياريت ما ينزلوش الشغل الصبح و في اخر الشهر ياخدوا المرتب اللي هما عاوزينه,لعلها دعوة للافاقة من الوهم اللي عايشين فيه بعض الناس بالنسبة لموضوع الشغل و الكفاح لتوضح فعلا انه اللي عاوز يكسب قرش حلال و ربنا يبارك له في رزقه و في عياله لازم فعلا يعرق ويحس انه تعب بجد و لعلمك الموضوع ده مش مشكلة الجيل بتاعنا بس و لكنها مشكلة مبادئ و تربية فلعلك تتعجب اذا سمعت والدتي ذات الستين من عمرها كل يوم منذ تخرجي و التحاقي بالعمل الخاص الى الان و على طول و هي تتشاجر معي في انه مش لازم ادي الشغل اوي كده طالما انني مش بستريح و استمتع بحياتي زي باقي الناس و انه لازم اسيب الشغل و ادور على شغل جديد احسن و اريح (ياماما مافيش شغل مريح و كلما زادت المهام و المسئوليات زاد التعب ) و لكن هي نسيت انها ربتني على الاخلاص و التفاني في كل شئ و الخشية من الله و مراقبته في كل وقت . ربنا معاك و معانا.... ثانيا بالنسبة لفضيلة الشيخ علي جمعة فهذا امر مفروغ منه هو فعلا فيه حاجة غريبة ,,, بس مش غريبة على المحبين !!!! ربنا يجعلنا منهم. و بالنسبة لانفلوانزا الطيور... و بحكم اني (ط.ب)الموضوع ده موجود من زمان جدا في مصر من قبل حتى مل يظهر في الخارج بس نظرا لغياب الرقابة المستمر والي حيستمر على طول لم تسلط عليه الاضواء وقتها و بعدين ياعم فيها ايه لما كام واحد يموتوا انت نسيت ان عندنا تضخم سكاني؟؟؟؟!!! و الله دول حتى استريحوا من وش التعديلات الدستورية الجديدة... الناس انهارده كانت فاكرة انها راحة تنتخب الريس!!!!!! علشان بس تعرف ان الشعب المصري ده غلبان اوي على رأي زميل في الشغل ( ما حدش فاهم حاجة ) اما بالنسبة للعراق فاانا ماليش في السياسة. و بالنسبة للبنك المركزي ... برده دا مش من اختصاصي اصلي مش بحب الفلوس . في رايي انه جميل للواحد انه يكون مطلع على الاوضاع من حوله ولكن لابد له مش شئ يتميز فيه و يتفوق و ينبغ فيه ممكن الواحد يكون لديه القدرة و الرغبة و الطاقة فيحس انه عارف كل شئ و يقدر على كل شئ و لكن هو عاوز اللي يوجهه لحاجة واحدة يكون نابغ فيها و يطلع كل مالديه فيها.
اما موضوع الام فلا تحقيق فيه
طبعاالام بتاعت زمان غير الام بتاعت دلوقتي.. , طيب تعمل ايه انت اذا وجدت ام سنها من بتوع زمان وعقلها من بتاع دلوقتي , و لديها ابناء سنهم من بتوع دلوقتي و عقلهم من بتوع زمان ؟؟؟؟
Post a Comment