خبر ورد من القاهرة العامرة الزاهرة ...بعد ما تعبت فى الجدليات السابقة و لم يستمع لها احد ..صحيح ما حنا فى زمن انتشار ثقافة العنب العنب ...المهم الخبر بيقول طالبت لجنة الحريات بنقابة المحامين بالإفراج الفوري عن أمين الشرطة الذي حكم عليه بالحبس لرفضه حراسة السفارة الإسرائيلية كما طالبت بإسقاط التهم الموجهة له وإعادة فتح التحقيقات المعطلة في حوادث قتل الجنود المصريين علي الحدود مع إسرائيل.. أصدرت اللجنة بيانا الاثنين قالت فيه إنه في الوقت الذي يعبث الكيان الصهيوني فيه بالمقدسات الإسلامية في القدس الشريف ويقتل أبناء الشرطة الذين يحرسون الحدود ترغم وزارة الداخلية أحد أفرادها علي حراسة مقر السفارة الإسرائيلية بالقاهرة وتقدمه للمحاكمة.- حسبما ذكرت جريدة الوفد ...كان أمين الشرطة محمد خلف قد رفض حراسة مقر السفارة الإسرائيلية وأضرب عن الطعام فأحيل لمحاكم عسكرية عاقبته بالحبس 6 شهور ...مش غريبة و النبى؟؟
اولا : العامة مشغولين بلقمة العيش و اغانى العنب العنب مع الميكروباس العامر بسكان المحروسة؟
ثانيا: المتعلمين عارفين ان لا اسرائيل حاتحس على دمها و لا حد حايعتذر لنا ؟و كله حرق دم ؟
ثالثا: المثقفين عارفين كويس ان نقابة المحامين شغالة على مبدا نشجب و نستنكر و كله بلا فايدة ؟
رابعا : اصحاب الجدليات ووجع الدماغ اللى زيى مابقوش عارفين؟نقفل الشباك و لا نفتحه ؟نلوم العسكرى و لا نعاقبه ؟الولد مذنب و لا هربان من الخدمة؟الحكم سليم و لا يلزمه احساس ؟نص القانون و لا روحه ؟؟ايهما الذى يطبق فى مصر؟
الاكيد انه لا ده و لا ده ...قانون واحد هو السارى الان...قانون العنب ؟
5 comments:
ما هو العنب شغال في كل حاجة حتى كمان في المشاعر الانسانية تعمل و لا ما تعملش ما انت كده كده وحش و ملام تشتغل و تخلص و لا اي كلام كله واحد في الاخر على الاقل بتاع العنب بيحب حاجة و مخلص ليها لكن اللي بيلعب على كل الاوتار تقول عليه ايه
الفيلسوف
صدقت يا فيلسوف اى عدل على الارض شريعة الانسان ام شريعة السماء واى فكر ونهج نتبع ولمن نسعى ان نرضى وما عقاب من لا يرضى الاسياد وبأى منطق وقوانين نحكم وعلى اى تشريع نرتكز وهل هو عادل ام لا
بس العنب اكيد هو السبب ويمكن البلح المهم ان فى قانون من مملكة الفاكهة
تحياتى
حتى العنب اصبح مضروبا ونقرت حباته
العصافير
سمعت ان صاحب قانون العنب الشهير بنى مسجدا
فقاطعه الناس
لكنه لم يبال
ألم يغسل أمواله ويتطهر
الناس هم اللى كفرة وزناديق
جرب منهج القياس
ستجده سارياً... وبشدة
الاخت الاولى خالص...كل واحد بيتهم الاخرين ..برضه بيقول على نفسه مخلص؟
توتة ...احلى حاجة فى بلدنا ان السلطة كان تعبير قديم و الان الفاكهة ..اللى جاى بقى هو الفرووت سالاد؟
استاذة حلم ...حتى المثال اللى ذكرتيه و الله يحير؟ طيب يصلوا و لا لا ؟ احنا عايشين نتهم الناس و نتتبع اخطاؤهم و لا نسند بعض و نستر و نسامح؟تحياتى
العنب و البلح و الفروت سلاط و الفاكهة كلها و كمان غير الفاكهةو اللي انت عاوزة ماشي وحاضر ياباشا اللي تامر بيه و مشي حاللك و خليك ملحلح و متعرضهاش كده. الراجل علشان طلع عنده شويه من الاحمر الي بيقولو عليه ده ... دخل السجن طبعا والله عندهم حق ده جزاة الضمير و الوطنية و حب البلد دي و الخوف على مصلحتها و مصلحة شعبها / بس انا مصممة على رأي انه اذا محدش قام وقال رأيه و عمل غير ما الكل بيعمله و الي هو منتهى عدم الضمير. البلد دي مش حتقوم من كبوتها ابدا .... يا جماعة انتوا نسيتوا ان مشوار الالف ميل يبدأ بخطوة و هي دي الخطوة احنا ليه زعلانين مهو دا المتوقع في اي بداية للاصلاح وصحوة الضمير الواجب علينا الصبر و التمسك بالمبادئ وكمان نشجع الولد ده و غيره ممن لديهم ضمير وحب ووطنيةونحاول ندور عليهم في كل مكان و نعطيلهم له القوة و التشجيع ده المهم دلوقتي بدل ما نقعد نتكلم ونتهكم على الحال و نمصمص شفايفنا ..... الحال حيفضل كده على طول لو احنا ما اتغيرناش و بدأنا نتحرك ...... لا يغير الله قوما حتى يغيروا ما بانفسهم
Post a Comment